Ministri i Infrastrukturës, Liburn Aliu ka folur pas mbledhjes së Qeverisë, në të cilin kabineti qeveritar ia miratuan kërkesën e Aliut për ndërtimin e autostradës Prizren-Tetovë.
Ai tha se varianti më i mirë i mundshëm është nëse ndërtohet një tunel i cili do të jetë mbi 6 kilometra i gjatë.
“Është një rrugë e rëndësishme pavarësisht vështirësisë sepse është në pjesë të Malit Sharr. Tashmë kemi mbërri në faza shumë konkrete dhe kjo më bën mua të lumtur dhe i falënderoj ministrat që e votuan këtë propozim.
6.4 kilometra tunel dhe është në fshatin Manstricë dhe në anën tjetër Brozoc të Maqedonisë.”, tha ai.
Tutje ai tha se ky projekt mund të realizohet nga e njejta kompani edhe për pjesën e autostradës në Kosovë edhe për Maqedoninë e Veriut.
“Ky projekt do të realizohet me komisione të përbashkëta mbase do të kemi edhe kompaninë e njejtë që do të bëj dizajnimin”, u shpreh Aliu.
“Përafërsisht do të kushtojë 150 milionë euro”, tha ai.
