Dikur kryetar i qytetit të Ulqinit, sot deputet i koalicionit “Jednoglasno” (shq. “Njëzëri’) në Kuvendin e Malit të Zi dhe kryetar i Partisë Demokratike, Fatmir Gjeka ka dhënë një intevistë për gazetën malazeze “Pobjeda”.
Ai është pyetur për një bashkëpunim të mundshëm me koalicionin që po qeverisë Malin e Zi, ku bën pjesë edhe zv.kryeministri shqiptar, gjithashtu nga Ulqini, Dritan Abazoviq i “URA”-s.
Gjeka ka qenë i prerë në atë se çka mendon, duke thënë se një qeveri e cila ka ëndërr që të kthehet ushtria e Serbisë në Kosovë, nuk është në hartën e tij.
“Nuk kam as dëshirë, as vullnet e as hapësirë për njëfarë bashkëpunimi të mundshëm me ata që flasin keq për pakicat, ëndërrojnë për kthimin e ushtrisë serbe në Kosovë dhe fantazojnë për ‘Botën Serbe’ në territoret e huaja”, ka thënë Gjeka.
