Parku Kombëtar i Thethit, i ndodhur 70 km larg Shkodrës po tërheq gjithnjë e më shumë vëmendjen e turistëve vendas dhe të huaj.
Drejtori i Administratës së Zonave të Mbrojtura në Shkodër, Agim Dardha tha për ATSH-në se “nga muaji janar deri në fund të shtatorit ky park u vizitua nga 78 600 turistë vendas e të huaj”.
“Gjatë muajit shtator ky park u vizitua nga 10 460 turistë vendas e të huaj, ndërsa 1 mijë vizituan Qendrën e Vizitorëve të ngritur në këtë park”, tha Dardha, duke shtuar se Qendra e Informacionit vijon të jetë e hapur çdo ditë të javës.
Parku Kombëtar Theth vijon të jetë zgjedhja më e mirë këto ditë vjeshte e turistëve vendas e të huaj. Pikat kryesore që turistët vizitojnë në Theth janë Monumenti e Natyrës si Syri Kaltër, vaskat në Ndërlysa. Ujëvara e Grunasit, kanioni i Grunasit, shtegu Theth-Valbonë, shpella e Arapit, Shtegu i Bjeshkëve të Namuna etj.
Thethi gjendet në mes të Alpeve në veri të Shqipërisë, 70 km nga qyteti i Shkodrës, i mbrojtur nga tre malet, Radohima, Sheniku, Papluku, me lartësi mbi 2500 m mbi nivelin e detit. Pasuritë natyrore të kësaj zone janë të lidhura së bashku edhe me trashëgiminë kulturore dhe historike të banorëve vendas, duke formuar kështu, bazat më të rëndësishme për zhvillimin e turizmit.
Thethi është i vizitueshëm në katër stinët, ku në pranverë dhe verë për gjelbërimin e rrallë, në dimër për bardhësinë e dëborës dhe për lojërat aventureske me të, ndërsa vjeshta për ngjyrat mahnitëse dhe begatinë në frutikulturë.
