Turqia mund të largohet nga NATO nëse vendet e tjera nuk i marrin parasysh kushtet e saj për hyrjen e Suedisë dhe Finlandës në aleancë. Dalja e Ankarasë nga Alenaca u kërkua nga kreu i Partisë së Lëvizjes Nacionaliste (MHP) Devlet Bahçeli, një aleat i presidentit turk Rexhep Tajip Erdogan.
Ultranacionalisti turk vuri në dukje se Turqia gjithashtu mund të krijojë organizatën e saj të sigurisë me pjesëmarrjen e vendeve turke dhe 57 shteteve të botës islame. “Kjo mund të jetë më e drejta… Turqia nuk është në një situatë të pashpresë, ajo ka opsione. Siç jetuam me NATO-n, do të jetojmë edhe pa të”, tha kreu i MHP-së.
Më herët, lideri turk Rexhep Tajip Erdogan parashtroi një sërë kushtesh për vendet skandinave, pas së cilës ata do të marrin miratimin e Ankarasë për t’u bashkuar me aleancën. Në veçanti, kërkesa kishte të bënte me dëbimin në Turqi të 33 personave nga Finlanda dhe Suedia, të cilët, sipas palës turke, mbështesin terrorizmin.
