Shoferi i autobusit nga Korça bënte manovra në rrugë, kapet i pirë kur kishte 36 pasagjerë me vete

Një shofer nga Korça është vënë pas hekurave pasi u konstatua duke kryer manovra me autobusin ku hipur ishin 36 pasagjerë.

Komisariati i Korçës njofoi sot se 56 vjeçari A.M. u ndalua në Qafë Plloçë, pasi ishte njoftuar me një telefonatë për manovrat e shoferit, duke e testuar nëse kishte pirë.

Sipas rezultatit efekti i pijeve të konsumuara nga shoferi ishte në masën 0.75 mg/l.

Njoftimi i plotë:

Pogradec
Bashkëpunimi me komunitetin parandalon një ngjarje të mundshme rrugore me pasoja.
Vihet në pranga shoferi i autobusit të linjës Korçë-Tiranë, i cili drejtonte mjetin në gjendje të dehur me 36 pasagjerë brenda.
Pas marrjes së një telefonate në Sallën Operative se një shofer i linjës Korçë-Tiranë, po kryente manovra jo te mira në rrugë, specialistët e Sektorit për Policinë Rrugore në Drejtorinë Vendore të Policisë Korçë, kanë ndaluar në aksin rrugor Korçë-Pogradec, pranë vendit të quajtur Qafë Plloçë, mjetin autobus, i cili transportonte 36 udhëtarë nga Korça në drejtim të Tiranës, me drejtues shtetasin A. M.
Pas kontrollit të dokumentacionit dhe kryerjes së testit të alkoolit drejtuesit të mjetit, ky shtetas rezultoi se drejtonte autobusin nën efektin e pijeve alkoolike në masën 0.75 mg/l.
Në vijim të veprimeve procedurale, nga strukturat e lartpërmendura u bë ndalimi në flagrancë i shtetasit A. M., 56 vjeç, banues në Korçë, për veprën penale “Drejtimi i automjeteve në mënyrë të parregullt”.
Materialet i kaluan Prokurorisë pranë Gjykatës së Shkallës së Parë Pogradec për veprime të mëtejshme.
Drejtoria Vendore e Policisë Korçë falënderon qytetarët që besojnë te Policia dhe lajmerojne per shkeljet e rregullave të qarkullimit, duke kontribuuar në rritjen e parametrave të sigurisë së jetës në rrugë.
Njëkohësisht, Policia e Shtetit apelon për zbatim të rregullave të qarkullimit dhe fton qytetarët që të denoncojnë në Komisariatin Dixhital dhe në numrin e emergjencave 112, çdo paligjshmëri.