Ish-Kryeministri britanik, Tony Blair vizitoi së fundmi Beogradin në cilësinë e këshilltarit të Presidenti serb, Aleksandar Vuçiç. Blair, që drejtoi Britaninë e Madhe për 10 vjet, nga 1997 deri në 2007-ën u prezantua para zgjedhjeve të 2013 si këshilltar i socialistëve në Shqipëri.
“Nëse ne fitojmë, do të jemi shumë të kënaqur të punojmë me Blair-in, duke u mbështetur te këshillat e tij për organizimin e qeverisë së re dhe riorganizimin e politikës shqiptare. Partia jonë frymëzohet nga vizioni i laburistëve të rinj dhe i Tony Blair-it. Blair ishte shumë i qartë kur tha se dëshironte të na ndihmone dhe unë e besoj”, deklaronte në atë kohë Edi Rama.
Dy vite më vonë, në 2015 Blair dhe kompania e tij u kontaktua nga qeveria serbe për këshillime të Aleksandër Vuçiç, në atë kohë Kryeministër. Pikërisht si këshilltar i tij besohet se Blair vizitoi së fundmi Beogradin.
Duke komentuar këtë vizitë, Presidenti kroat, Zoran Milanoviç thotë se Kroacia e tij nuk ka nevojë më për “të tilla marrëdhënie” me Tony Blair, duke folur për raportet e tij me Shqipërinë dhe Serbinë.
“Ai (Blair) është një prej politikanëve më të mëdhenj në 30 vitet e fundit. Disa janë inatosur me të për shkak të pikëpamjeve të tij për emigrimin, që mbeten ende të njëjta. Kjo është edhe arsyeja se përse ndodhi Brexit. Nuk dua të tregohem i ashpër, por nuk mendoj se Kroacia ka ende nevojë për një raport të tillë, si Serbia dhe Shqipëria”, citohet Presidenti kroat nga Jutarnji List.
