Hasan Ceka studioi në Vjenë, ku u dallua si student i shkëlqyer. Pas kthimit në Shqipëri, në vitin 1930, punoi në Bibliotekën Kombëtare, krijoi një koleksion arkeologjik, të cilin edhe sot e trashëgon Biblioteka e Institutit të Arkeologjisë, ndërsa ka përfaqësuar Shqipërinë pranë misioneve të huaja arkeologjike në Apolloni e Butrint
Drejtoria e Përgjithshme e Arkivave në Shqipëri ka kujtuar arkeologun Hasan Ceka në ditëlindjen e tij.
“Nëntoka jonë mban kushedi edhe sa e sa dëshmi të tjera për paraardhësit tanë, e ajo që është zbuluar deri më tani është falë punës së palodhur e plot përkushtim të arkeologëve tanë. Andaj në ditën e tij të lindjes, kujtojmë njeriun që për më shumë se gjysmë shekulli iu kushtua tërësisht kërkimeve e studimeve për arkeologjinë shqiptare”, ka afishuar në Facebook Drejtoria e Përgjithshme e Arkivave.
Hasan Ceka studioi në Vjenë, ku u dallua si student i shkëlqyer. Pas kthimit në Shqipëri, në vitin 1930, punoi në Bibliotekën Kombëtare, krijoi një koleksion arkeologjik, të cilin edhe sot e trashëgon Biblioteka e Institutit të Arkeologjisë, ndërsa ka përfaqësuar Shqipërinë pranë misioneve të huaja arkeologjike në Apolloni e Butrint.
Në vitin 1947 drejtoi ekspeditën e parë arkeologjike në Apolloni, si dhe punën për krijimin e Muzeut Arkeologjik Etnografik në Tiranë. Në vitin 1956 kthehet në Apolloni, për t’ia kushtuar qytetit antik tërë veprimtarinë e tij kërkimore e studimore. Cekës i takon merita e zbulimit të një kompleksi arkitektonik në afërsi të ndërtesës së Agonoteteve, e nimfeut të qytetit dhe e shumë veprave të tjera.
Midis veprave të tij janë edhe “Ilirët dhe Iliria te autorët antikë”, “Probleme të numismatikës ilire”, “La Branche Sud de la Voie Egnatia, Monumentet 1”, “Illyrie. Etudes et materiaux archeologiques”, “Questions de numismatique illyrienne, avec un catalogue des monnaies d’Apollonie et de Durrhachium”, “Inscriptions d’Apollonia d’Illyrie, Athen 1997” dhe “Në kërkim të historisë ilire”. Ceka vdiq më 2 nëntor 1998.
