Pamje mahnitëse vijnë nga ishulli i Maligradit dhe kisha e Shën Mërisë, në Prespë. Ishulli i Maligradit gjendet në Liqenin e Prespës së Madhe, si një sofër gjigante në mes të ujit dhe në këto ditë të nxehta vere ka mjaftë vizitorë.
Në ishull ndodhet edhe kisha e famshme e Shën Maria e Kishës, e ndërtuar nga Kesar Novak (Qesar Novaku) në 1369.
Ajo është një nga monumentet më me vlerë të trashëgimisë kulturore. Në këtë ishull janë gjetur edhe objekte arkeologjike si tjegulla, kollona e kapitele që i përkasin një kishe paleokristiane, që mendohet të ketë qenë në pjesën e sipërme të liqenit.
Sipër këtij ishulli, ndodhen edhe rrënojat e vilës verore të Car Simeonit të shekullit XI.
Kisha e Shën Mërisë është një themelim i vjetër dhe ka shërbyer si qendër shpirtërore për prijësit shqiptarë. Mbishkrimet që gjenden në këtë kishë i përkasin periudhave të ndryshme të lidhura me historinë e këtij monumenti.
Një mbishkrim në faqen jugore, më i hershmi në këtë kishë i përket vitit 1345 dhe fazës së parë të zbukurimit të kësaj kishe me afreske.
Ishulli ka gjatësi rreth 800 metra e gjerësi rreth 200 metra dhe rrethohet nga shpate shumë të pjerrët, me përjashtim të pjesës perëndimore të tij. Në këtë ishull ka bimësi natyrore barishtore dhe shumë pak shkurre, shpella e zgavra karstike.
Sikurse shihet nga fotot që sjell LSA pamjet janë të mrekullueshme.
